Vanillu Cupcakes með Sviss Marengs kremi

Þessar vanillu cupcakes eru í miklu uppáhaldi á mínu heimili. Það sem toppar þær svo klárlega er kremið sem sett er ofan á.

Kremið heitir Sviss Marengs og er engu líkt. Það eru endalausir bragðtegunds-möguleikar með þessu kremi, en hingað ætla ég að setja uppskrift af grunninum og þremur af mínum uppáhalds bragðtegundum - Jarðaberja, Lime/kókos og mokka.

Vanillu cupcakes:

Innihald: 3 bollar hveiti 2 bollar sykur 1 msk lyftiduft 3/4 tsk salt 250 gr lint smjör/smjörlíki

(hef prófað bæði, mér finnst betra að hafa smjörlíki) 4 stór egg 1 bolli nýmjólk 1 tsk vanilludropar

Aðferð:

• Hitið ofnin í 175°C

• Hrærið saman þurrefnunum. Hrærið á litlum krafti þar til þurrefnin hafa blandast vel saman. Bætið þá linu smjörinu/smjörlíkinu út í og hrærið vel. (Verður dálítið þurrt)

• ATH! Ef þið ætlið að gera mokka krem þá finnst mér oft gott er að bæta 1 1/2 msk af kakói út í deigið í þessu skrefi.

• Pískið saman í öðru íláti, egg, mjólk og vanilludropa.

• Bætið þessu svo saman við hræruna í vélinni, í þremur skömmtum. Hrærið þar til allt hefur blandast vel saman, en ekki hræra of lengi!

• Setjið deigið í möffinsform, fyllið 2/3 af hverju formi með deigi. Mæli með að kíkja á þessa færslu hér til að sjá hvernig best er að fá bollakökurnar til að vera allar jafn stórar.

• Mér finnst mjög gott að vera með mini cupcake form því þau eru fullkomin stærð! Hin geta verið svolítið stór og það geta ekki allir torgað stórum cupcakes!

• Bakið í miðjum ofni í 17 – 20 mín. (11-15 mín með litlar)

Látið möffinsin kólna alveg áður en kremið er sett á, svo það bráðni ekki á þeim.

Sviss–marengs krem:

Innihald: 5-6 eggjahvítur 1 1/4 bolli sykur

(Hægt að setja púðursykur í staðinn, t.d. ef maður er að gera mokka krem) 1 tsk vanilludropar 250 g lint smjör

(Betra að hafa smjörið mjög lint, helst búið að standa á borði í nokkrar klst) Hægt er að setja matarlit ef á við

Aðferð:

• Þeytið eggjahvíturnar á fullum hraða í vél

• Setjið sykurinn út í smátt og smátt og hrærið í a.m.k 5 mín, eða þar til þær eru alveg stífar

• Setjið vanilludropana út í og hrærið í smá stund

• Bætið linu smjörinu smátt og smátt útí og hrærið vel á milli

• Kremið á til að skilja sig í þessu skrefi eða verða kekkjótt, en örvæntið ekki, það þarf bara að hræra á fullu í a.m.k 10 mín og þá verður það fínt!

• Þetta er vanillukremið. Nú ef þið mynduð vilja vanillukrem á cupcakes-in þá væri ekkert annað í stöðunni núna en að sprauta kreminu á, eða smyrja það á!

• Ef þið viljið annað bragð í kremið þá er það gert þegar kremið eins og það er núna er búið að hrærast vel í a.m.k 5 mín og þá er bragðefnið sett útí smátt og smátt

• Þá á kremið það aftur til að skilja sig, og þá er bara að halda áfram að hræra og það mun lagast aftur!

• Hér eru 3 dæmi um bragðefni:

Jarðaberja:

• 1 box jarðaber + 2-3 msk appelsínusafi mixað ör sutt í blandara (ekki alveg í mauk þá) og bætt svo út í kremið

• Ég ef líka prufað að setja bara nokkrar msk af jarðaberjasultu beint út í kremið og það var líka mjög gott!

Lime/kókos:

• Limesafi + lime börkur (ca. 1 1/2 lime) + 2-3 msk kókosmjöl sett út í kremið

• Alltaf gott að smakka kremið og bæta meiru við ef þarf!

Mokka:

• 2-3 msk (eftir smekk) af rótsterku kaffi ásamt 1 msk af kakóki hrært saman og svo kælt sett út í kremið

• Einnig er gott að setja nokkrar (kannski 1 msk) af söxuðum súkkulaðihúðuðum kaffibaunum út í kremið og nota svo aðeins minna saxaðar kaffibaunir sem skraut ofan á.

• Í þessu kremi er gott að nota púðursykur í staðinn fyrir venjulegan sykur!

• Verði ykkur að góðu!

- Unnur Anna -